Goldern Jubilee

Kum 1962 March ni 8 a, Headmaster, Zirtirtu pahnih, Office Staff pakhat leh Zirlai 32 nen maia he School dintute khan, kum 2012-hovin, Zirtirtu, thawktu dang leh Zirlai sang rual zet nen Golden Jubilee ropui takin an la law mang tih hi an hmu lawk thiam bik hauh lovange le! Kum 1987 a Silver Jubilee nangte leh kum 2002-a Ruby Jubilee phak te pawh khan, heng kum chhunga thil inbukthuah chho zawng zawngte hi han thlir kir se sawi tur an ngah ve fe ang le! A lunglenthlak zawnga ngaihtuah duh tan kurpui fe tham a awm ang a, a ropui zawnga ngaihtuah duh tan pawh sep rawtuitham fe, lawmna tur leh nuihpui tur lam zawnga ngaihtuah duh tan leh a vuivaina leh lungawihlohna lam zawnga ngaihtuah duh tan pawh chuti tho.

Ngaihtuahna kak tuai karah, thil dang zawng chu dahthain, hlim tak leh tluang tak, theih ang tawka ropui, nuam leh tlai puara GOLDEN JUBILEE lawman report lamah I han insawrbing dawn mai the ang:-

GOLDEN JUBILEE LAWM KAN DUH

Kum 2008, March 7 Staff Meeting chuan, “Golden Jubilee Lawm ngei nise” tiin Organising Committee Bearers tur a ruat a, hetiangin:

Chairman : Pu Rozama Chawngthu

V/Chairman : Pu C. Hmingthanzama

Secretary : Pu Lalremchhunga Pachuau

Joint Secy : Pu P.C. Lalrinpuia

Treasureer : Pu Zirkungi

Finance Secy : Pu Lalthanzama

Office Bearer atana ruatte hian May 25, 2008-ah Meeting hmasa ber an nei a. Staff Meeting-in thuneihna a pek angina committee peng pariat a siam a, Golden Jubilee Celebration Organising Committee a din nghal bawk. Committee peng hrang hranga Chairman leh Secretary theuhte leh SHSS Alumni Association President leh Secretary te chu Organising Committee member atana raut an ni.

Tin, Ex-Officio member te pawh ruat nghal an ni bawk, hetiangin:-

Organising Committee members:

• 1.Upa Zoliana Royte, Former Teacher
• 2. Pu Hmingthansanga, Lab. Assistant
• 3.Pi C. Lalhmangaihi, Former Vice Principal
• 4.Tv. Vanlalvanga Ralte, Lecturer
• 5.Upa Dr. Vanlalzara, Ex-Student
• 6.Pu Lalduhawma, Lecturer
• 7.Upa C. Thangnghilhlova, Former Teacher
• 8.Pu Lalremliana, Teacher
• 9.Upa R. Lalmalsawma, Ex-Student
• 10.Pu Rodingliana, Teacher
• 11.Pu Jolly Newman, Ex-Student
• 12.Pu Joseph Vanlalhruaia Sailo, Lecturer
• 13.Pu Lalhruaitluanga Ralte, Ex-Student
• 14.Pu C. Lalrintluanga, Lecturer
• 15.Pu Lalthanzama, Teacher
• 16.Pu Lalnunfela, Lecturer
• 17.Pu Lal Rinawma, President, SHSS AA
• 18.Pu David Lalvensanga, Secy., SHSS AA

Ex-Officio Members:

• 1.Synod Moderator
• 2.Synod Executive Secy i/c Education
• 3.Synod Secretary(Sr.)

Organising Committee thukhawm tum 3 leh Office Bearers Meeting tum 9 neih a ni a. Heng bakah hian thu pawimawh ngaihtuah tura phungbawmte sawma inhmuhkhawmna pawimawh dang tum li neih a ni bawk.

SUB COMMITTEE

Golden Jubilee lawman atan Sub Committee pariat hengte hi siam a ni :- (1) Fund raising Sub-Committee (2) Souvenir Sub Committee (3) Information and Publicity Sub Committee (4) Monument Sub-Committee (5) Archive and Exhibition Sub Committee 6) Reception and Ushering Sub Committee. Heng bakah hian Sanitation leh Traffic lam buaipui tur i/c siam belh a ni bawk. Heng Committee peng hrang hrang member atan hian he School nena inzawmna nei, thawktu lo ni tawh emaw, zirlai lo ni tawh emaw leh thawk mek te vek ruat an ni.

JUBILLEE CHOIR

Office Bearers Meeting Vawi 5-na (Dt. 16.5.2011) chuan Jubilee Choir neih tha a ti a, mawhphur turte pawh ruat nghal niin an ni ho hmalaknain member 298 awmna Jubilee choir din a ni. Jubilee choir hian Jubilee lawman-ah hla mawi tak takin an rem a, tin, mipui zaihona zawng zawng an kaihruai vek bawk. Jubilee Choir te hi Jubilee lawman tiropuitu pawimawh tak an ni. Mawhphurtute leh member zawng zawngte chungah kan lawm hle.

BUDGET & FUND RAISING)

Golden Jubilee lawman atan Budget ₹12,00,000.00 (Nuai sawmpahnih) siam a ni a. Heng sum mamawhte hi SEC ah thlen a ni. SEC atangin Rs. ₹10,00,000.00 (Nuai sawm) phalsak kan ni a. Ruahman sa daih lohna tidanglam lovin SEC atanga phalsak bak ₹2,00,000.00 (Nuai hnih) chu Fund Raising Committee atanga hmuh tura beisei a ni. Fund Raising Committee-in kawng hrang hranga hma a lakna azarah Synod lam atanga hmuh bak pawh kan intuak ngah thei a, a lawmawm hle a ni.

JUBILEE LAWM HUN KAN RUAT FU HLEI THEI LO

A mak ngawt nia, a hun kan sawn sek mai, Jubilee lawm hun atan, “School din tan ni (8^th March) hmang tel ngei ila”, tih a ni phawt a. (Office Bearers Meeting Vawi 2-na, Dt. 31.7.2009) Amaherawh Board Exam hun lai a nih avangin, “April 18 & 19 ah”, tih a ni leh a. (Organising Committee Meeting Vawi 1-na, Dt. 24.9.2010). Mahse chu pawh chu School session awm danah remchan lohna a lo la awm cheu. Chuvangin, “May 2 & 3 ah, a lawman hmun pui ber atan pawh Contact Sports Centre, Mission Vengthlang”, tih a han ni leh a. (Office Bearers Meeting Vawi 6-na, Dt. 8.7.2011). Mahse chu pawh remchan lohna a awm leh ta tho mai. Synod hotu lam te an remchan dawn loh tlat avangin Board Executive Committee, SEB chuan May 9 & 10 a lawman neih turin rawtna a han siam leh ren rawn a. Mahse chu pawh remchan lohna a lo la awm tak zel avangin Oranising Committee thutkhawm vawi 2-na (Dt. 13.4.2012) chuan October 3 & 4 a ruat leh a, hun ruat tum ngana meuh chu a kal tlang ta a ni.

SCHOOL HLA THAR A PIANG

Tuna Principal ni mek Pu Rozama Chawngthu phuah School hla tha tak school-in a nei a. Amaherawhchu he School Hla kan neih lai hi Synod High School nih laia phuah a nih avangin, kimhlel deuh tawha hriatna a awm a ni mai thei e, Organising Committee Meeting Vawi 1-na (Dt. 24.9.2010) chuan Golden Jubilee pualin School Hla Inphuahsiak buatsaih nise a tih angina School Hla (English) Inphuahsiak buatsaih a ni. Lawmman dawngtute chu heng mi te hi an ni :-

Pakhatna - Liansailova, Mission Vengthlang

Pahnihna - Lawmnakima Hmar, Chanmari III, Lunglei (Synod Complex)

Pathumna - H. Rohmingthanga, Tuikual ‘N’

Hla Inphuahsiak result puan leh lawman sem hi ni 3.6.2011 ah neih a ni a, lawman Pakhatna ₹5,000/-, Pahnihna ₹3,000/- , leh Pathumna ₹2,000/- pek an ni. Hla Inphuahsiak endiktute chu heng mite hi an ni :-

• 1)Pu Rozama Chawngthu
• 2)Pu Lalremchhunga Pachuau
• 3)Nl. Ngurzikpuii Sailo
• 4)Pi Ellen Lalthanzuali
• 5)Pu Lalremliana

School Hla thar hi a thluk Insiamsiakna buatsaih leh a ni a. Lalhmangaihzuala Sailo, Thingsul Tlangnuam a mi hla thluk siam chu School Hla thluk atana thlan a ni. Hla thluk insiamsiak result puan leh lawman semna hi ni 13.4.2012 ah neih a ni a, lawmman atan ₹5,000/- pek a ni. Endiktu atan heng mite hi hman an ni :-

• 1)Pu Rozama Chawngthu
• 2)Pu C. Hmingthanzama
• 3)Pu C. Lalrochhara
• 4)Tv. Vanlalvanga Ralte

SCHOOL ARCHIVES BUL TAN A NI

Organising Committee hnuaia committee peng pariat zianga pawimawh tak pakhat chu Archives & Exhibition hi a ni awm e. Kum sawmnga zet ni ta chu lehkha hlui leh thil hlui hrim hrim, pawimawh tak tak vawn that ngai a lo awm ta nual mai. Thil hlui, ennawm atana pho chhuah (exhibit) satliah ni mai lo deuhvin, a dahthat leh vawn that zel duhna rilru atanga ‘Archives’ tih pawh hi telh a ni. Kan Principal zahawm tak Pu Rozama Chawngthu thahnemngaihna leh Archives & Exhibition Committee hruaitu leh member te thawhrimna vang liau liauvin Archives Room kan lo nei ta. Tunah la famkim lo mahse, thangthar lo lang zel turte tana chhunzawm theih tura bul tanna a han awm ta hi a chhinchhiahtlak hle a ni.

ALUMNI ASSOCIATION A PIANG

Office Bearers Meeting Vawi 2-na (Ni 31.7.2009) chuan Synod Higher Secondary School Alumni Association din tha a ti a, Staff Meetingah rawtna thlen a ni. Staff Meeting Vawi 1-na (Dt.14.1.2010) chuan SHSS Alumni Association din rem tiin, a tul anga hma la turin heng mite hi a ruat :-

Pu C. Hmingthanzama

Pu P.C. Lalrinpuia

Pu Lalremliana

May 19, 2011 chawhnu dar 2:15 khan Alumni Association din chunchang rel turin Vice Principal Room-ah mi paruk an inhmukhawm a. Chuta tel te chu heng te hi an ni:-

Pu C. Hmingthanzama, Vice Principal

Tv. Laldinthara (Aitea), Zozam Times

Pu F. Lalramdinliana (Tetea), Mission Vengthlang

Pu T. Lalbiakdika, Zalen

Pu Lalremchhunga Pachuau, Teacher, SHSS

Pu Lalremliana, Teacher, SHSS

He inhmuhkhawmnaah hian Synod Higher Secondary School Alumni Association (SHSS AA) chu din niin, a tul anga hma la nghal turin heng a hnuaia mite ruat an ni :-

Convener - Pu Lal Rinmawia, Vanglaini

Secretary - Tv. Laldinthara, Zozam Times

Members - 

Pu F. Lalramdinliana, Mission Vengthlang

Pu T. Lalbiakdika, Zalen

Pu Vanlalrema Vantawl, Zalen

Tv. Lalhruaitluanga Chawngte, Zozam Weekly

Pu H. Vanhlupuia, Dawrpui

Adhoc hruaitu atana ruatte hmalaknain May 31, 2011(Tue) ah, SHSS Assembly Hall ah hruaitu thlanna neih a ni a. SHSS Alumni Association Office Bearers hmasa ber atan heng a hnuaia mi te hi thlantlin an ni :-

President - Pu Lal Rinmawia, Mission Veng

Vice President - Pu Zothanmawia, Khatla

Secretary - Tv. David Lalvensanga, Khatla

Asstt. Secreatary - Pu T. Lalbiakdika, Salem Veng

Treasurer - Pi Lalrohlui Sailo, Tuikual South

Finance Secy. - Dr. Lalbiakmawia Ngente, Bungkawn

Heng hruaitu thar tha tak takte hian hma la nghalin, Executive member-te an ruat a. Synod Higher Secondary School Alumni Association (SHSS AA) tha tak leh nung tak kan nei zui ta a ni. SHSS AA lo ding ta hi Golden Jubilee rah chhuah pawimawh tak zing ami a ni awm e. SHSS AA hruaitu hian School an ngheng tha hle a, Golden Jubilee lawman chungchangah pawh Organising Committee dan tawiawm thain an thawp tha e mem a, hlawhtling tak leh tluang taka Jubilee kan lawm theihnaah a kila lung pawimawh an ni tak meuh a, an chungah Organising Committee a law mem em a ni.

JUBILEE KHUH HAWNNA

Ni 3.6.2011 (Zirtawpni) 2:15pm ah Pu Lalthanzama, Finance Secretary, Organising Committee-in ropui takin Jubilee Khuhhawnna a hun a hmang. Programme hi School Assembly Hall-a neih a ni. Pu C. Hmingthanzama, Vice Chairman, Organising Committee-in inkawhm a kaihruai thung. Pu Lalremchhunga Pachuau, Secretary, Organising Committee hnen atangin report ngaihthlak a ni a, Golden Jubilee pual School Hla Inphuahsiak result puan leh lawmman sem a ni bawk. Lawmman hi Synod Executive Secretary, Rev. Lalzuithanga’n a sem a, amah vek hian Pu Rozama Chawngthu ziah, “Principal Thuchah” (booklet) a tlangzarh bawk. Lal Rinmawia leh Fin. Secretary Dr. Lalbiakmawia Ngente te hnen atangin thusawi ngaihthlak a ni. Nancy Zothanmawii, former student-in zaiin min awi.

JUBILLEE BLOOD DONATION

Ni 12 & 13.9.2012 ah Golden Jubilee pualin thisen pek runpui-Jubilee Blood Donation programme buatsaih a ni. Thisen hi Synod Hospital, Durtlang tana pek a ni. Thisen petu zawng zawng hi mi 245 (Thawktu – 3, Zirlai – 195, Alumni – 47) an ni. Blood Donation programme hi School Assembly Hall-a neih a ni a, Pu C. Hmingthanzama, Vice Chairman, Organising Committee-in Pathian hnena tawngtaiin a hlan a ni.

JUBILEE HANTLANGPUI

Ni 21.9.2011 (Zirawpni) chawhma lamah School awmna veng, Mission Vengthlang thler hrang hrang thian faiin Jubilee Hnatlangpui neih a ni a. Mission Vengthlang kawn atanga School panna kawng ba leh ko phei chu a sama sam fai a ni. Hnatlangpui hi COSCOM ruahmanna leh kaihhruainaa neih a ni.

JUBILEE CONECRT

Ni 21.9.2012 (Zirtawpni) chawhnuah Alumni Association bultumin School Ground-ah Jubilee Concert ropui tak leh tluang taka neih a ni. Jubilee Concert-a item neitu zawng zawngte hi Synod Higher Secondary School nena inzawmna nei vek an ni a, a lawmawm danglam hle. Alumni Association hian Jubilee Concert-a an sum hmuh atangin Golden Jubilee pualin Rs. 20,000/- lai an rawn chhunglut nghe nghe a, a lawmawm hle.

JUBILEE KAN LAWM E – JUBILEE HAWNNA

Ni 3.10.2012 (Zirtawpni – 9:30 - 11:00am) ah Hon’ble Finance Minister, Pu H. Liansailova, Chief Guest-in Golden Jubilee a hawng. Jubilee Hawnna Inkhawm hi Contact Sports Centre, Mission Vengthlangah neih a ni. Pu Rozama Chawngthu, Principal-in inkhawm a kaihruai a, ruahman lawk angina programme tluang taka hman a ni.

Rev. Mangchhuana Sailo, Former Principal-in hunserh a hmang a. Jubilee Choir-in thiam takin Opening Song (School Hla) an sa. Chairman-in Welcome Speech a Address ngaihthlak a ni bawk. Chief Guest thusawi ngaihthlak a ni a, Pu Lalremchhunga Pachuau, Secretary, Organising Committee hnen atangin Jubilee Report tlangpui ngaihthlak a ni bawk. Jubilee Dar vaw tura ruat (Chief Guest, Former Headmasters, Former Principals & Vice Principals, Synod Puipate & Officers, Pensioners, Organising Committee OB & Sub Committee Chairman, SHSS AA Office Bearers, Senior staff-employed since 1996 leh 1962 Batch) mi 62-in Jubilee Dar an vua a. Jubilee Dar hi School din tirha School Dar vuak thin ngei kha a la ni a, ngaihhlut a hlawh hle.

Golden Jubilee Cake mawi leh tui tak, Golden Jubilee Hawnnaa tel zawng zawngte ei sen loh khawpa lian, SHSS Alumni Association-in a buatsaih chu Pi C. Lalhmingmawii, Former Vice Principal-in a zai a, Jubilee hawnna programme-a kal ten an hlimpui hle.

School Cultural Group-ten mawi tak leh thiam takin Cheraw bu 4 zet an entir a, mit an titlai hle.

Rev. Vanlalzuata, Senior Executive Secretary-in lawmthu sawi tawngtaina hun a hmang a. School hlapui, “Krista, kohhran tan kan ding”, tih hla ding chunga sain, Headmaster hmasa ber, Rev Dr. Lalngurauva’n malsawmna sawiin Jubilee Hawnna programme a khar.

JUBILEE MONUMENT HAWN A NI

SHSS Golden Jubilee hriatrengna atana Monument Committee-in an siam, Jubilee monument, School Ground sir ami chu ni 3.10.2012, dar 11:30am ah Rev. Zosangliana Colney, Executive Secretary i/c Education-in a hawng.

ARCHIEVES & EXHIBITION HAWN A NI

Archive & Exhibition Committee buatsaih, Golden Jubilee Archives & Exhibition chu ni 3.10.2012, dar 11:45am ah Rev. Lalzuithanga, Executive Secretary, Mizoram Synod-in a hawng. Exhibition hi Arts Building ground Floor-ah neih a ni a. Helai hmun hi School Archives & Museum atan hman zui nghal tura ruahman a ni.

ZIRLAITE PUAL PROGRAMME

Ni 3.10.2012 (Thu) 1:00 pm – 3:00 pm ah Zirlaite Pual programme hman a ni. Zirlaite Pual Programme hi Contact Sports Centre, Mission Vengthlangah neih niin, Pu P.C. Lalrinpuia, Jt. Secretary, Organising Committee chu Chairman a ni. Lalthanpuia Hrahsel, Leader, Prayer Cell in hunserh a hman hnuah, Compere atana ruat Ramdinsanga, XII-C leh Winnie C. Lalbiakmawii XII-C ten programme an kaihhruai. Ruahman lawk angina programme chhimtute mit leh beng pawh a tlai hle.

HUN URHSUN

Ni 4.10.2012 (Thu) 9:30 am – 11:30 am ah Hun Urhsun programme hman a ni. He hun hi Vice Principal, Pu C. Hmingthanzama’n kaihhruaiin, Contact Sports Centre, Mission vengthlangah hman a ni.

Upa Lalthlengliana, Former Headmaster-in hunserh a hmang a, Jubilee Choir-in “Hringnun Khawvel” tih hla mawi takin an rem.

Kal tate sunna hun hman a ni a. Thawktu an nih laia chatuan ram pan ta mi 2 te leh pension thleng thawk, an thawh tawh loh hnua chatuan ram pan ta mi 3 te bakah, zirlai an nih laia chatuan ram pan ta mi 22 te sunna hun hman a ni. Pu Lalremchhunga Pachuau, Secretary, Organising Committee-in sunte chanchin tawi a chhiar chhuak a. Sunte thlalak hi programme-a tel zawng zawngte hmuh theih turin, screen lianah, projector hmanga lantir zel a ni bawk. Sun tak chhungte pawhin he hun hi ngai pawimawhin an rawn kal tha hle. Upa Malsawmdawngliana, Former Principal-in sunte puala tawngtaina hun a hmang a, Jubilee Choir kaihhruainain “Ka Lalpa duhtak min awmpui ang che” tih hla kan sa bawk.

He hunah hian School din tirh atanga HSLC, HSSLC (Sc. & Arts) Exam-a Top Ten leh Subject Topper kan neihte chawimawina hun hman a ni. HSLC a chawimawina dawng mi 19 ah 12 an rawn kal thei a, HSSLC (Sc.) chawimawina dawng mi12 ah 3 rawn kalin, HSSLC (Arts) chawimawina dawng 14 ah 9 an rawn kal thei bawk.

Heng bakah hian pension thlenga thawk, min la dampui mi 6 te hnenah chawimawina hlan a ni a. Tin, kum 1962, School din tirha zirlai hmasa ber 32 zing la dam mi 24 hnenah chawimawina hlan a ni bawk. Anni hi hmun hrang hranga awm darh leh upa lam tawhte an ni chungin mi 20 lai rawn inlawnin chawimawina an rawn dawng thei a, a lawmawm hle.

Heng kan mi chawimawi zawng zawngte hian, Pu Rozama Chawngthu, Principal kut atangin chawimawina thil hlan (memento) an dawng a ni.

Golden Jubilee Souvenir Magazine (sample) tlangzarh (release) na hun hman a ni a. Pu C. Lalrintluanga, Secretary, Souvenir Sub-Committee-in report tawi a pe a.Souvenir hi Upa D.P. Biakkhuma, Synod Secretary (Sr.) in a tlangzarh. Tin, Souvenir Committee-in an buatsaih Jubilee hriatrengna dang Book Mark leh Pen pawh a thlawna sem chhuah a ni.

Jubilee Choir kaihhruainain “Kan pathian kan puipa pangai” tih hla ding chungin kan sa a, Upa Thantluanga, Former Headmaster-in Malsawmna tawngtaina hmangin Hun Urhsun programme a khar.

ALUMNI PUAL PROGRAMME

Ni 4.10.2012 (Thu) 12:30 pm – 2:30 pm ah Alumni Pual programme hman a ni. Alumni Pual programme hi Alumni Association-in a ruahman a ni a, Contact Sports Centre, Mission Vengthlangah neih a ni.

Programme hi Dr. Lalbiaakmawia Ngente, Fin. Secretary, SHSS AA in a kaihruai a. Pi C. Lalhmangaihi, Former Vice Principal in hunserh a hman zawhah, Jubilee Choir ten programme hawnna atan “School Hla” leh “Chawimawina” hla thiam tak leh ropui takin an rem. “Chawimawina” tih hla phuahtu hi Malsawmtluanga, Former Student a ni nghe nghe. Alumni Association hian HSLC leh HSSLC (Sc. & Arts) Exam-a zirlai titha chawimawina hlan thin an tum bul tan nan, HSLC leh HSSLC (Sc. & Arts) Examination 2012 Distinction a pass chin te hnenah chawimawina an hlan. Heng chawimawina te hi Pi F. Lalropuii, Former Vice Principal leh Rev. Zosangliana Colney, Executive Secretary i/c Education ten an hlan a ni.

SHSS AA President, Pu Lal Rinmawia hnen atangin thusawi ngaihthlak a ni a, Secretary, Pu David Lalvensanga hnen atangin Report ngaihthlak a ni bawk.

Heng bakah hian special items chi hrang hrang a awm a, chhimtute mit leh beng a tlai hle.

JUBILEE RUAI

Ei leh In Committee-in an buatsaih Jubilee Ruaipui chu, ni 4.10.2012 chawhnu dar 2:30 atangin School Campus-ah theh tan a ni. A ropui hle. A ropui tizualtura chhum zing karah, hriatupuina ruahman chhiarsen loh nen, mi 2500 chuang zetin Jubilee Ruai kan kil a ni.

JUBILEE THILPEK SCHOOL-IN A DAWN TE

• 1.Pu H. Thanchunga, Ramthar Hostel Warden hnen atangin lehkhabu
• a)Mizo Nula Huaisen (C. Biakthuami rawngbawlna chanchin) - 5 copies
• b)Khawvel History - 5 copies
• 2.Alumni Association hnen atangin pawisa fai – Rs 20,000/-
• 3.Headmistress & Staff, P.C. Girl’s School - Digital Wall Clock
• 4.1976 Batch-te atangin – Steel Almirah
• 5.1980 Batch te atangin – Office a hman tur dawhkan lian leh nalh tha tak
• 6.Local Council, Mission Vengthlang atangin – Photo Album lian tha tak

LAWMTHU

Jubilee tluang tak leh hlawhtling taka kan lawm chung changah lawmthu sawina tur a tam hle, sawi kim sen a ni hial loving. Hmaih neih hlauh vanga sawi loh ngawt chu a ni ngawt bik si lo. Kan tarlan bak hmaih a lo awm a nih pawhin, hmaih palha inngaihsak a, inhriatthiamah kan ti mai a ni ang chu.

Synod Executive Committee-in Jubilee lawm min phalsak a, kan mamawh sum Rs 10,00,000/- lai min pe bawk a. Committee ah min telpuiin, a lawman hunah min tawiawm tha e mem bawk. Min phurpuina leh an inhawnna avanga Jubilee lawm thei pawh kan ni e. An chungah kan lawm em em a ni.

Organising Committee leh Committee peng hrang hranga member atan ruat, a bik takin pawn lam mi a ngaih tawh, School-in neitu ni-a kan ngaih tlat, he School atanga zir chhuak tawh leh thawktu hlui tam tak kan tibuai a. Sorkar, Kohhran leh khawtlanga pawimawhna leh tulna tam tak nei chungin, neitu nih-na min chansak tlat thei hlawm a. An pawimawhna leh theihna zawnah, “Kan School tan” ti a an chetna zawng zawng hi School-in a ngai hlu a, a chhinchhiah a, an chungah kan lawm takzet a ni.

Golden Jubilee lawmtu zawng zawng min dawl zo tur Hall neia kan inhriat loh avangin, Sports Authority of India ah Contact Sports Centre hman phalna kan dil a. Kan dilna mintihhlawhtlin saka phalna min petu Assistant Director, Pu Lianhmingthanga chungah kan lawm hle.

Chief Guest atan inthlahring takin Pu H. Liansailova, Hon’ble Finance Minister kan sawm a. Programme pawimawh leh tul tam tak karah kan sawmna min tihhlawhtlinsak a, a lawmawm em em a, a chungah kan lawm a ni.

He School awmna veng, Mission Vengthlang hian nu leh pa chan min chansak thiam thlawt a, a lawmawm takzet a ni. Local Council-in kan engkim min hriatpuiin min tuamhlawm peih thin. Thilpek hlu tak School tan an pe bawk. Presbyterian Kohhran Committee-in kan mamawh an hnena kan thlen apiang I he lovin min thehchhuah zung zung a. Ei rawngbawlna atana bungraw mamawh chi hrang hrang, plastic chair 200 chuang, etc. hawh man awm lova min hmantir te, YMA lamin ruai buatsaihna atana kan mamawh bungbel a thlawna min hmantir te, Cultural Club-in Cultural Dress a thawna min hmantir te avangin kan lawm takzet a. Tin, JAC lam thlengin security thilah kan pur buai bawk. Mamawh kan dill eh kan thlen apiang min ngaihtuahsakin min tihhlawhtlinsak a ni ber mai. Kohhran leh khawtlang hruaitu leh veng chhung nu leh pate chungah kan lawm em em a ni.

Kan tih theih loh, kan tana hna harsa min thawhsak turin SYNFO kan sawm a, an nin Jubilee kan lawm hun chhungin video coverage min rawn tihsak a. Coordinator leh Staff zawng zawng chungah kan lawm e.

Headmistress & Staff, PC Girls’ School in kan sawmna ngai pawimawhin School chawl meuhvin thawktuten Jubilee lawman min rawn tawiawm a. Cheraw atana kan mamawh cultural dress te min hawhtirin, Jubilee thilpek Digital Wall Clock tha tak leh mawi tak min pe bawk.

Mi tam tak kan sawm a, lo dawl turin kan inring tawk leh si lo. Traffic lama min buaipui turin Pu Lallianmawia, Aizawl SP Traffic kan ngen a. Anin kan mamawh ang tak ruahmanna min siamsakin, a tul ang zawng zawngah min buaipui a. Tun thik lo se, “Kan School tan te chuan….” A ti pawh a ni mahna le! Amah leh a staff te chungah kan law mem em a ni.

Er. Jolly Newman (Former Student) in Jubilee Concert leh Jubilee lawm hun chhunga power supply tha tak kan hmuh theih nana hma min laksak a. Er. V. Rodingliana (Former Student) in Jubilee lawman programme neihna hmun Contact Sports Centre electrification min ngaihtuahsak bawk. Tin, Pu C. Vanlalvena (Former Teacher) in Kanat leh samiana kan mamawh zawng zawng min hawntir a. Pu Lalbiakthanga khiangte (Former Student) in kan mamawh lam khawmna leh senghawi lehna atana hman tur motor min ngaihtuahsak vek bawk.

Tv. V.L. Muanchhana (Former Student) in Screen lian kan mamawh a thlawnin min hmantir a. Pu Lalhmingmawia (Former Student & Chairman, Local Council, Mission Vengthlang) in ruai buatsaihna atana ama lirthei phal taka min hmantir mai bakah, ama lirthei a remchan loh pawhin ama sum sengin motor min hire-sak bawk. Tin, kan mamawh hun takah Pu Joe RZ Thanga, Mission Vengin a thlawnin Projector min hmantir a, a chungah kan lawm em em bawk. SHSS Alumni Association hi Golden Jubilee lawman programme tihlawhtling-tu pawimawh tak an ni. Jubilee Blood Donation ah an thawh hlawk e mem a. Jubilee Concert hlawhtling taka buatsaihin, chuta an sum hmuh atangin pawisa fai thahnem tham tak Jubilee lawman atan an chhung lut. Jubilee Cake ropui leh man tam tak an siam a, Alumni Pual programme hlawhtling tak leh tha taka siamin, zirlai t echo phur nan Board Exam-a zirlai tithate hnenah chawimawina an hlan bawk. School-in a mamawh hun leh hmun apiangah School tan an ding chat chat thei zel a, SHSS AA hruaitute leh member zawng zawngte chungah kan lawm em em a ni.

Synod Higher Secondary Schoolin Golden Jubilee a lawm chung change thil lawmawm danglam tak chu, Chanvo nei tura ruat zawng zawng ten an chanvo theuh te, a hun tak zelah tluang tak leh tha takin an rawn hlen chhuak thei vek a. Chanvo nei tura ruat zawng zawngte chungah kan law mem em bawk a ni.

THAWKTU LEH ZIRLAITE MAWHPHURHNA

Synod Higher Secondary School Golden Jubilee lawmnaah hian Thawktu zawng zawng zawngte chu chanvo leh mawhphurhna bik pek vek an ni. Thawktu te chu Organising Committee Office Bearers, Sub Committee Secretary leh member atan ruat kim vek an ni.

Zirlaite pawh Jubilee Choir member leh Cultural Group member ah te, Zirlaite Pual leh Alumni Pual programme-a special items chi hrang hrangah te, Receptionist, Usher, Refreshment Volunteers, Decoration & Seat Arrangement volunteers, sanitation volunteers, Traffic & Security Volunteers leh Archives & Exhibition Duty ah te mawhphurhna pek vek an ni a. Henga tel lo zirlai thenkhatte pawh JOVS (Jubilee On Call Volunteers) tih hming phuahin, a tulna hmun apianga chhawr theih turin mawhphurhna pek an ni bawk.

Golden Jubilee lawmnaah hian Synod Higher Secondary School Staff zawng zawng leh zirlai zawng zawngte kan tang rual a. A te ber atanga a lian ber thlengin tumah awl bik kan awm lo. A intih zirtirtu theih ngawt lohva, senior nih pawh a sawi theih bik loh. Hmeichhe nih leh mipa nih a lem lova, len leh tetin kawngro a su hek lo. Sweeper nih chang a awm a, electrician nih chang a awm. Engineer leh designer nih chang a awm a, a chang leh mistiri. Chief Cook a inngaite pawh tlangau an lo nih leh daih chang a awm bawk. Peon hna kan thawk a, Dak runner nih a ngai a, typist nih chang a awm a, painter nih a ngai bawk. Sound Engineer nih chang a awm a, waiter anga char kan nih chang a awm bawk. JAC leh Traffic police nih chang a awm a, musician leh soloist nih chang a awm bawk. Kan Guitar zut thiam, keyboardist tha a kan neih leh Drums roll thiam ber bera kan neih te pawh chem tum nena kopang an lawn tawi tawi chang a tam mai. Kan cameraman te pawh, an digital camera tha ber berte aia an harpic leh Collins lek vel a lansarh zawk chang a tam mai. Sawi sen pawh a ni love. A tawi zawnga sawiin, a tul hun leh hmun apiangah, “Engkim kan ni”, tih hian a khaikhawm fuh mai awm e. Thawktu zawng zawng leh zirlaite thawhrimna leh inpekna hi a ropui a, a lawm takzet a ni.

Hetiang taka thawktu leh zirlaite kan tan tlan theih nana kawng hawng thiam, mi ho khawm thiam leh remhria Principal leh Vice Principal kan nei hi kan vannei a. An kaihhuraina hnuaia awm hi a thlamuanthlakin, thawktu leh zirlaite tan a nuam a, a hlimawm a, a phurawm reng mai a ni.

Golden Jubilee tluang taka lawm thei leh, hetiang taka lawmthu inhrilhtawn theia kan awm chhan hi, kan dil te min ngaihthlaksak a, min tihhlawhtlinsak tu, kawng tin renga min hruaitu Pathian vang chauh a ni a. A hnenah lawmthu awm rawh se. 

Latest Update

Downloads